أنا و جوجل أدسنس .. طرفه ربما تعجبك

السلام عليكم ورحمه الله وبركاته

انهارده موضوعنا مختلف تماما عن اي موضوع في المدونه , موضوع انهارده هيتكلم عن تجربتي مع برنامج جوجل ادسنس واكيد معظم زوار المدونه عارفينه وللناس اللي متعرفهوش هو من الاخر نظام برنامج اعلانات شركه جوجل عاملاه لاصحاب المواقع والمنتديات والمدونات لو اتوافقت مع شروطهم بيضعوا عنده اعلانات وبتاخد نسبه ربح من الاعلانات دي مقابل كل نقره , المهم مش موضوعنا 

أنا دخلت مجال الانترنت تقريبا وانا كنت ف اعدادي بدأت في النت المجاني والثغرات وفهمتهم علي طول وازاي تجيب ثغرات الشبكات وبدأت اشرح للناس واعدل برامج الاوبرا ميني عشان تفتح علي اتصالات ببلاش كان ساعتها عز اتصالات في النت المجاني , المهم مسكت اشراف في احد المنتديات علي قسمين النت المجاني للكمبيوتر والموبايل المهم قدمت حاجات كتير وكنت الحمدلله محبوب بين الاعضاااء والكلام ده , انا مش عايز احكي القصه كلها عشان محدش يحس بملل :D بس المختصر المفيد اني مستفدتش حاجه من المجال ده ، قولت اجرب مجال تاني بردو ليه علاقه بالنيمبز ظهر ادامي مجال البرمجه لأني بدرسه في المعهد " معهد ازهري " عشان محدش يفتكر انه معهد لاسلكي ولا حاجه :D المهم عملت برامج للنيمبز وكانت في المدونه هنا قبل ما احذفها تماما ولقيت نفسي مش مستفيد ، قولت انا ضيعت كام سنه علي النت من غير اي استفاده عايز احقق حاجه احس فعلا ان النت مضيعش وقتي علي الفاضي لقيت ادامي ادسنس قولت اجرب اشترك جربت مره واتنين وتلاته وكل مره اترفض مره محتوي غير كافي مره مفيش سبب وهكذا الي اخره ...

دي مقدمه مش اكتر ويارب محدش يكون جاله ملل ^_^ المهم من 7 ايام بالظبط قدمت في ادسنس واتقبلت الحمدلله وبدأت الاعلانات تظهر وحققت ربح 31 دولار في 5 ايام طبعا ده تعتبر حاجه كويسه جدا بالنسبه لشخص اول مره يشترك في ادسنس بس زي ما بيقولوا الحلو ميكملش , واحد الله يسامحه مكان ماهوا قاعد مبيحبش الخير ليا تقريبا او هو بيحقد علي اي حد المهم لقيته ضاغط علي اعلان واحد 510 ضغطه !! طبعا عدد كبير يكفي انه يقفل حساب ادسنس نهائيا ، المضحك في الحكايه ان الشخص ده مصري قولت في نفسي سبحان الله !! ما مصر فيها مواهب اهي 510 ضغطه :D علي كدا ده بطل وعلي قد الصدمه من غلق حسابي وتوقف الاعلانات ضحكت علي الموهبه الفذه دي بصراحه قولت الحمدلله محدش بياخد اكتر من نصيبه ولعله خير . اصحابي لما عرفوا زعلوا بصراحه وحاولوا يخففوا عليا ^_^ , طبعا الأخ اللي ضغط الضغطات دي كلها مسلمش من لسانهم وزمانه واخد حسنات منهم كلهم :D المهم قولت مش هيأس وهحاول تاني عملت ايميل جديد وقدمت في ادسنس والحمدلله قبلوني وفضلت سهران للساعه 4 ونص الفجر عشان اراقب الاخ اللي هيدوس علي الاعلانات ويقفله زي الاكونت الاول ملقتش ضغطات قولت الحمدلله هنام مطمن كدا , روحت نمت وصحيت الظهر تاني يوم مبسوط وجاي جري علي الكمبيوتر عشان اتابع المدونه والاعلانات اتفاجئ وانا بفتح الاكونت يقولي ' تم تعطيل حساب جوجل ادسنس الخاص بك ' o.O !!... لالالا اوعي تكون افتكرت اني زعلت او اتضايقت بالعكس انا جالي حاله ضحك هيستيري :D قولت لنفسي يعني سهرت عشان تنام مطمن وان كل حاجه تمام تصحي تلاقيه اتقفل ، قولت الحمدلله وبردو ميأستش وعملت حساب للمره التالته ولحد دلوقت وانا بكتب الموضوع ده شغال الله اعلم هيكمل ولا هيقفلوه زي الباقيين ربنا يستر :)
بس نسيت اقولكم ان ليا واحد صاحبي اسمه عبد الرحمن بيضحكني جدا لما احكيله حاجه مضايقاني , عارفين ليه ؟؟ دايما يقولي اصبر بلاش استعجال حتي لو الموضوع مفهوش استعجال يقولي اصبر الصبر حلو اقوله ايه ياعبدو انت حكيم صيني ؟ :D ايه يابني حد مسلطك عليا . طب بذمتك ياعبدو انت بتقول لنفسك الصبر حلو قد ايه يقولي كتيييير اقوله وبتلاقي بعد الصبر حاجه يقولي لأ :D اقوله طيب ... العبره من القصه الطويله جداااااا وربما يشوفها بعضكم ممله ان اليأس مش حل مش معني انك حد حاقد عليك في حاجه انك تيأس بالعكس حاول مره واتنين وتلاته وهتوصل بإذن الله , ومش معني كدا انك تصبر كتير لحد ما الوقت يفوتك. واحلي حاجه في الحكايه ان ليك اصحاب يقفوا جمبك مش مستنيين منك مقابل كل اللي يهمهم انهم مش يشوفوك متضايق من حاجه او مخنوق ومش عبد الرحمن بس اللي دايما يواسيني كدا في ناس تانيه بس بصراحه مستأذنتش حد فيهم انزل اسمه كدا :D
يارب الموضوع يعجبكم او علي الاقل ميكونش دمه تقيل

لو ليك موقف مع جوجل او أي موقف ممكن تسيبه في تعليق او ممكن تستخدم صندوق تعليقات الفيس بوك ;) 

منشورة في: طرف من حياتي